पाँचथर— पाँचथरको फालेलुङ गाउॅपालिका—५ प्राङवुङमा विस्फोट हुँदा तीन जना बालबालिका घाइते भएका छन्।
घाइते हुनेमा स्थानीय डाँडागाउँ निवासी दिलीप साँवाका ११ वर्षीय छोरा दिप्सन, अढाइ वर्षीया छोरी प्रिन्सा र छिमेकी ९ वर्षीय पवन राई छन्।
घाइतेमध्ये दिप्सन र प्रिन्साको अवस्था गम्भीर छ। उनीहरूलाई उपचारका लागि झापा पठाइएको छ। एक जनाको जिल्ला अस्पताल पाँचथरमा उपचार भइरहेको जिल्ला प्रहरी कार्यालय पाँचथरका प्रमुख हेमन्त भण्डारीले बताए।
स्थानीयका अनुसार दिउँसो साढे २ बजे ठूलो आवाजमा विस्फोट भएको थियो। विस्फोट भएलगत्तै गएर हेर्दा बालबालिका घाइते अवस्थामा भेटिएका स्थानीयले बताएका छन्।
घाइतेमध्ये पवन राईका अनुसार खेलिरहेका अवस्थामा डल्लो आकारमा भेटिएका सामग्री पड्किएको बताए। पवनको अवस्था सामान्य छ।
घट्नाको जानकारी आएलगत्तै प्रहरी चौकी प्राङवुङबाट गएको टोलीले उनीहरूको उद्धार गरी उपचारका लागि जिल्ला अस्पताल पठाएको हो।
अनुसन्धानका लागी जिल्ला प्रहरी कार्यालयबाट टोली खटाइएको पनि भण्डारीले बताए।
