काठमाडौं— काठमाडौं महानगरपालिका–१७ ढल्कुस्थित पोडेटोलमा दुई समूहबीच झडप भएको छ। झडपमा खुकुरी प्रहार हुँदा एक जनाको मृत्यु भएको छ। मृत्यु हुनेमा ३३ वर्षीय अनिल पुजारी छन्।
छिमेकीसँग विवाद हुँदा अर्को समूहले खुकुरी प्रहार गर्दा पुजारीको मृत्यु भएको जिल्ला प्रहरी परिसर काठमाडौंका एसपी नवराज अधिकारीले बताए। ६ जना घाइते भएका छन्।
झडपमा ५२ वर्षीय सुबिन्द्र पोडे, ५४ वर्षीय किरण पुजारी, ४९ वर्षीय दिनेश पुजारी, ४२ वर्षीया माया पुजारी, ३९ वर्षीय विक्रम पुजारी र २३ वर्षका अमृत पुजारी घाइते छन्।
घटनामा संलग्न ७ जनालाई प्रहरीले पक्राउ गरेको छ। पक्राउ पर्नेमा १९ वर्षीय सुजल देउला, ३५ वर्षीय अमृत पुजारी, ३४ वर्षीय सागर देउला, ४६ वर्षका रबिन्द्र पोडे, २९ वर्षीया कलेनी पुजारी, ३५ वर्षीया टिकामाया पुजारी र २२ वर्षीया सञ्जाली पुजारी छन्।
घाइतेहरुको त्रिवि शिक्षण अस्पताल महाराजगञ्ज, ट्रमा सेन्टर र पिपुल्स अस्पतालमा उपचार भइरहेको एसपी अधिकारीले बताए। घटनाबारे थप अनुसन्धान भइरहेको छ।
