काठमाडौं— प्रधानसेनापति प्रभुराम शर्माले नेपाली सेनाका बलाध्यक्ष रथी अशोकराज सिग्देललाई कायममुकायम प्रधानसेनापति नियुक्तिका लागि सिफारिस गरेका छन्। शर्माले आइतबार कायममुकायम प्रधानसेनापतिका लागि सिफारिस गरेका हुन्।
कायममुकायम प्रधानसेनापतिको निर्णय आजै रक्षामन्त्रालय हुँदै साँझ ५ बजे बस्ने मन्त्रिपरिषद्को बैठकबाटै पारित गर्ने तयारी छ।
आजको मन्त्रिपरिषद् बैठकले साउन २४ गतेपछि लागू हुने गरी सिग्देललाई कामु प्रधानसेनापति बनाउने निर्णय गर्न लागेको सैनिक स्रोतले जानकारी दियो। हालका प्रधानसेनापति शर्मा आगामी भदौ २४ मा सैनिक सेवाबाट अनिवार्य अवकाश पाउँदैछन्।
सेनाको परम्पराअनुसार प्रधानसेनापतिबाट अवकाश पाउनु एक महिनाअघि साउन २४ बाट उनी बिदामा बस्दैछन्।
बलाधिकृतरथी सिग्देलले अहिले बलाध्यक्षको समेत जिम्मेवारी सम्हालिरहेका छन्। सिग्देलले अहिले आफ्नो कोर टिम बनाएर भावी नेतृत्वको रुपमा सैनिक मुख्यालयमा काम सुरु गरिसकेका छन्।
प्रधानसेनापति शर्माले समेत उनलाई महत्वपूर्ण जाहेरी र कामहरू हस्तान्तरण गरिसकेका छन्।
