काठमाडौं—  गृहमन्त्री रमेश लेखकले विशेष ब्युरोमा कार्यरत प्रहरी नायब महानिरीक्षक डीआईजी मनोज केसीको सरुवा गरेका छन्।

नक्कली भुटानी शरणार्थी प्रकरणमा संलग्न बेचन झालाई पक्राउ गर्ने केसीको गत बुधबार गृहमन्त्री स्तरीय निर्णयबाट सरुवा गरिएको हो।

उनलाई प्रहरी प्रशिक्षण प्रतिष्ठान महाराजगञ्जमा पठाइएको छ भने प्रतिष्ठानमा रहेका डीआईजी राजन अधिकारीलाई ब्युरोमा पठाइएको छ।

केसीको दुई महिना नबित्दै सरुवा गरिएको हो। केसी र अधिकारी गत जेठ ४ गते सँगै बढुवा सिफारिसमा परेका थिए। बढुवा हुनुअघि केसी नेपाल प्रहरी प्रधान कार्यालय महिला बालबालिका तथा ज्येष्ठ नागरिक सेवा निर्देशनालय नक्सालमा कार्यरत थिए।

नक्कली भुटानी शरणार्थी प्रकरणमा फरार रहेका बेचन झा र प्रतीक थापालाई पक्राउ गर्न केसीको भूमिका थियो। दुवैलाई असार १४ गते शुक्रबार पक्राउ गरेको थियो।