काठमाडौं— मलद्वारमा लुकाएर ल्याएको एक किलो सुनका मुख्य योजनाकारलाई झण्डै एक वर्षपछि प्रहरीले पक्राउ गरेको छ।

जिल्ला प्रहरी परिसर काठमाडौंको विशेष टोलीले काभ्रेको महाभारत गाउँपालिका–२ का विकास योञ्जनलाई आज अपरान्ह काठमाडौंको चाबहिलबाट पक्राउ गरेको प्रहरी उपरीक्षक नवराज अधिकारीले जानकारी दिए।

प्रहरीले २०८० भदौ २५ गते दुबईबाट हिमालयन एअरलाइन्समार्फत नेपाल आएका बाबुलाल दोङलाई मुख्य योजनाकार योञ्जनले पठाएको नौ सय ६० ग्राम सुन भन्सार छली मलद्वारमा लुकाएर ल्याएको अवस्थामा पक्राउ गरेको थियो। विमानस्थल बाहिर सडक पेटीमा हिँड्दै गरेको अवस्थामा दोङ पक्राउ परेका थिए। 

प्रहरीवृत्त गौशालाले जाँच गर्दा दोङले मलद्वारमा कालोटेपले बेरिएको दुई वटा लाम्चो र डल्लो सुन नौ सय ६० ग्राम फेला पारेको थियो। अनुसन्धानका क्रममा दोङले उक्त भन्सार छलीको सुन योञ्जनको भएको बयान दिएका थिए। सुनसहित दोङ पक्राउ परेपछि योञ्जन फरार रहेका थिए।