काठमाडौं— हनी ट्र्याप गरेर करोडौँको बार्गेनिङ गर्ने एक युवतीसहित २ जनालाई प्रहरीले पक्राउ गरेको छ। शुक्रबार काठमाडौं उपत्यका अपराध अनुसन्धान कार्यालयको टोलीले उनीहरुलाई बौद्धबाट पक्राउ गरेको हो।

पक्राउ पर्नेमा सिन्धुपाल्चोकको मेलम्चीकी २० वर्षीया तेन्जी डोल्मा छिरिङ भन्ने सिर्जना तामाङ र जुगलका २९ वर्षीय सौरभ तामाङ भन्ने लिलाबहादुर तामाङ रहेका छन्।

कार्यालयका अनुसार सामाजिक सञ्जालका विभिन्न माध्ययममार्फत सम्पर्क गरेर पीडितलाई साथी बनाएकी सिर्जनाले कोठामा बोलाएर अश्लील भिडिओ रेकर्ड गरेको खुल्न आएको छ।

प्रहरी अनुसन्धानका क्रममा लिला बहादुर तामाङले पीडितको फेसबुक आइडी सिर्जना तामाङको ह्वाट्स एपमा पठाई साथी बन्न लगाएको र फेसबुक मेसेन्जरबाट सिर्जना तामाङले पीडितसँग कुरा गरी भेट्नलाई आफ्नो कोठामा बोलाएको खुलेको छ। 

साथै ती युवतीले सोही भिडिओ देखाएर उनीहरुले एक करोड बार्गेनिङ गरेको प्रहरीले जनाएको छ। तर उक्त पीडितसँग उनीहरुले बार्गेनिङ गरेर १५ लाख रुपैयाँ लिइसकेको प्रहरीको अनुसन्धानले देखाएको छ। 

आफू ठगिएपछि पीडत प्रहरीकोमा पुगेका थिए। पीडितको उजुरीको आधारमा उनीहरुलाई पक्राउ गरी प्रहरीले थप अनुसन्धान सुरु गरेको छ।