कैँचीले हानेर युवकको हत्या गर्ने नाबालकसहित ४ जना पक्राउ
मोरङ— एक युवाको हत्या र दुई युवालाई गम्भीर घाइते बनाएको आरोपमा प्रहरीले मोरङबाट तीन युवालाई पक्राउ गरेको छ।
असार २४ गते विराटनगर महानगरपालिका–२ प्रदेश टेलिकम कार्यालय नजिक रहेको सेन्ट जोसेफ स्कुलको मोडमा धारिलो हतियार (कैँची)प्रहारबाट २१ वर्षीय करण कामतको मृत्यु भएको थियो।
घटनामा १७ वर्षीय अमन राय र २२ वर्षीय विक्रम मण्डल घाइते भएका थिए। उनीहरु सबै कटहरी गाउँपालिका–१ का स्थानीय हुन्।
हत्या घटनामा संलग्न भएको आरोपमा मोरङ प्रहरीले सन्तोष सेर्पा, सोनु गिरी, सञ्जय पुरी र एक जना नाबालकलाई पक्राउ गरेको हो।
उनीहरूलाई जिल्ला अदालत मोरङबाट पाँच दिनको म्याद थप गरेर थप अनुसन्धान र कारबाही अघि बढाइएको जिल्ला प्रहरी कार्यालय मोरङका डीएसपी ज्ञानेन्द्र बस्नेतले जानकारी दिए।
प्रकाशित मिति: बिहीबार, असार २७, २०८१ १०:०३
थप समाचार
