काठमाडौं— काठमाडौं महानगरपालिकाले आगामी आर्थिक वर्ष २०८१/०८२ का लागि २५ अर्ब बढीको बजेट सार्वजनिक गरेको छ।
आज बसेको महानगरपालिकाको १५औँ अधिवेशन अन्तर्गतको तेस्रो बैठकमा महानगरकी उपप्रमुख सुनिता डंगोलले आगामी आर्थिक वर्षको बजेट प्रस्तुत गरेकी हुन्।
उनले आगामी आर्थिक वर्षका लागि २५ अर्ब, ७० करोड, ६३ लाख, २५ हजार बराबरको बजेट प्रस्तुत गरेकी हुन्।
जसमध्ये सबैभन्दा धेरै पूर्वाधार विकासमा खर्च हुनेछ। उपप्रमुख डंगोलका अनुसार महानगरले आगामी आर्थिक वर्षमा पूर्वाधार विकासका लागि १४ अर्ब ८१ करोड ५१ लाख ५१ हजार बजेट छुट्टयाइएको छ। जुन कुल बजेटको ६१ दशमलव २० प्रतिशत हो। त्यसैगरी महानगरले आगामी आर्थिक वर्षमा कार्र्यलय सञ्चालन तथा प्रशासनिक क्षेत्रका लागि ३ अर्ब ४९ करोड ४५ लाख २९ हजार अर्थात् कुल बजेटको १४ दशमलव ४४ प्रतिशत बजेट छुट्टयाएको छ।
त्यस्तै आर्थिक विकास योजनाका लागि १९ करोड १ लाख बजेट छुट्टयाइएको छ।
साथै सामाजिक विकास क्षेत्रका लागि ३ अर्ब, ८१ करोड ३६ लाख १५ हजार तथा सुशासन एवं अन्तरसम्बन्धित क्षेत्रका लागि १ अर्ब ८९ करोड २१ लाख ३० हजार बजेट छुट्टयाइएको छ।
यसअघि चालु आर्थिक वर्षमा महानगरले २४ अर्ब बढीको बजेट ल्याएको थियो। आगामी आर्थिक वर्षमा महानगरले ढलरहित नदीनाला, फोहोरलाई मोहर बनाउने योजना अघि सारेको छ।
