काठमाडौं— शेयर बजार कारोबार दुई वर्षयताकै उच्च भएको छ । मङ्गलबारको कारोबार ८ अर्ब नाघेको छ । नेप्से सूचक ५४.५४ अंकले बढेर २१७५.१७ पुगेको छ ।

नेपाल स्टक एक्सचेन्जको रेकर्डअनुसार २०७८ माघ ४ पछि हालसम्मकै उच्च कारोबार भएको हो । बैंकहरूको ब्याजदर घटेको असर शेयर बजारमा परेको हो । १४ कम्पनीको शेयरमा सर्किटस्तरको कारोबार भएको छ । ३०४ कम्पनीमध्ये २१४ को शेयर मूल्य बढेको छ । ३१ कम्पनीको शेयर मूल्यमा गिरावट छ भने २ कम्पनीको शेयर मूल्य स्थिर छ ।

मंगलबार सर्वाधिक बढ्नेमा फाइनान्स ४.७५ प्रतिशत छ । इन्भेस्टमेन्ट कम्पनी ३.७०, जलविद्युत ३.५१, लघुवित्त ३.०२ प्रतिशतले बढेको छ । सर्वाधिक कारोबार हुनेमा सोनापुर मिनरल्स, निफ्रा, एनआरएन इन्फ्रस्ट्रक्चर, हिमाल दोलखा हाइड्रोपावर र अपि पावर लगायतका कम्पनी छन् । सोनापुरको २८ करोड ३१ लाख, निफ्राको २३ करोड २६ लाख, एनआएन २१ करोड १३ लाख, हिमाल दोलखाको १७ करोड ६३ लाख र अपि पावरको १६ करोड ४६ लाख रुपैयाँ बराबरको शेयर कारोबार भएको छ । 

शेयर मूल्य बढ्नेमा बुटवल पावर कम्पनी, युनाइटेड मोदी हाइड्रोपावर, हिमालय पावर, एनआरएन इन्फ्रास्ट्रचर, नेपाल वेयरहाउस कम्पनी लगायत अगाडि छन् । मंगलबार २ करोड ३३ लाख ७० हजार ५३ कित्ता शेयर कारोबार भएको छ, जसमा कारोबार रकम ८ अर्ब २ करोड ३८ लाख रुपैयाँ पुगेको छ ।