काठमाडौं— एकैदिन एक हजार तीन सय रुपैयाँले बढेपछि सुनको मूल्य अहिलेसम्मकै उच्च विन्दुमा पुगेको छ ।

नेपाल सुनचाँदी व्यवसायी महासङ्घका अनुसार बिहीबार बजारमा छापावाल सुन प्रतितोला एक लाख २२ हजार रुपैयाँमा कारोबार भइरहेको छ । यो हालसम्मकै उच्च मूल्य हो ।

अघिल्लो दिन छापावाल सुन प्रतितोला एक लाख २० हजार सात सय रुपैयाँमा कारोबार भएको थियो । बिहीबार तेजाबी सुनको मूल्य भने प्रतितोला एक लाख २१ हजार चार सय रुपैयाँ कायम गरिएको छ ।

यसभन्दा अघि गत मंसिर १८ गते सबैभन्दा धेरै मूल्यमा कारोबार भएको थियो । सो दिन सुन प्रतितोला एक लाख २१ हजार छ सय रुपैयाँमा कारोबार भएको थियो । 

आज बजारमा चाँदीको मूल्य पनि बढेको छ । आज चाँदीको मूल्य प्रतितोला एक हजार चार सय ९० रुपैयाँ कायम गरिएको छ । अघिल्लो दिन चाँदी प्रतितोला एक हजार चार सय ७५ रुपैयाँमा कारोबार भएको थियो ।