काठमडौं— भारतको नयाँ दिल्लीस्थित प्रगति मैदानमा जारी वर्ल्ड फुड एक्सपो— २०२३ मा नेपालको लोकप्रिय चाउचाउ उद्योग एशियन थाई फूड्स प्रालिले समेत सहभागिता जनाएको छ ।

उक्त एक्सपोमा १ हजार बढी स्टल छन् भने ९० देशको सहभागिता रहेको छ । नेपालबाट उक्त एक्सपोमा सहभागि हुने एक मात्र उद्योग हो एशियन थाई फूड्स ।

एशियन थाई फूड्सको भारतका २५ राज्यमा आफ्नो डिलरसमेत छ । नयाँ दिल्लीस्थित प्रगति मैदानमा ३ नोभेम्बरदेखि जारी उक्त एक्सपोमा विभिन्न फुड स्टलहरु राखिएका छन् । एशियन थाई फूड्सले पनि आफ्नो उत्पादनको विभिन्न स्टल राखेको छ ।

भारतका लागि नेपाली राजदूत शंकर शर्माले एशियन थाई फूड्सको स्टलको अवलोकनसमेत गरेका छन् । सोही अवसरमा उनले एशियन थाई फूड्सद्धारा उत्पादित नयाँ प्रडक्ट टूपीएम कप नुडल्सको लञ्चसमेत गरे ।

एशियन थाई फूड्सले विश्वका विभिन्न मुलुकमा हुने फुड् एक्सपोमा सहभागिता जनाउँदै आएको छ । यसरी विभिन्न एक्सपोमा सहभागिता जनाउँदा नेपाली उत्पादनको प्रमोट हुने विश्वास एशियन थाई फूड्सको छ । एशियन थाई फूड्सले रमपम, टू पीएम, प्रितीलगायत ब्रान्डका चाउचाउ उत्पादन गर्दै आएको छ ।

त्यस्तै, चिप्स, चिजवलहरुसमेत उसले उत्पादन गर्दै आएको छ । एशियन थाई फूड्सले आफ्नो उत्पादन नेपाली बजारमा मात्रै नभएर भारत, अस्ट्रेलिया, अमेरिका तथा युरोपका धेरै देशमा निर्यात गर्छ । एशियन थाई फूड्स मुलुकको अग्रणी उद्योग पनि हो ।  

नेपालमा खाजा तथा खानाका रुपमा चाउचाउ खाने प्रवृत्ति बढ्दै गएपछि यसको माग पनि बढ्दै गएको छ । त्यसैलाई मध्यनजर गर्दै एशियन थाई फूड्सले आक्रामक रुपमा आफ्ना उत्पादन बजारमा ल्याइरहेको छ । खाजा र खानामा ‘नुडल्स कल्चर’ विकासको श्रेय पनि  एशियन थाई फूड्सलाई जान्छ ।