काठमाडौं — नेपाल राष्ट्र बैंकले मंगलबारका लागि विदेशी मुद्राको विनिमय दर तोकेको छ ।

जसअनुसार मंगलबार अमेरिकी अमेरिकी डलरको भाउ अहिलेसम्मकै उच्च बिन्दुमा पुगेको छ । अमेरिकी डलर एकको खरिद दर १३२ रुपैयाँ ९५ पैसा र बिक्री दर १३३ रुपैयाँ ५५ पैसा कायम छ । एक अमेरिकी डलरको बिक्री मूल्य १३३ रुपैयाँ ५५ नेपाली रुपैयाँ पुगेको छ जुन अहिलेसम्मकै उच्च कीर्तिमान हो ।  

सोमबारसम्म अमेरिकी डलरको भाउ स्थिर थियो । सोमबार १३२ रुपैयाँ ९३ पैसामा खरिद र १३३ रुपैयाँ ५३ पैसामा बिक्री भइरहेको थियो । डलरको भाउ तलमाथि हुनुमा नेपालको आन्तरिक नीतिको खासै कुनै योगदान छैन । बरु यसको सम्बन्ध अमेरिका र भारतको अर्थतन्त्रसँग छ।

डलरको भाउ बढ्दा नेपालजस्तो आयातमा निर्भर देशलाई सबभन्दा ठूलो मार महँगीमा पर्न सक्छ । 

दाल र तरकारीदेखि इन्धन अनि लुगाफाटासम्म सबै वस्तुको भाउ बढ्छ। चाहे विदेश पढ्न जाने हो वा घुम्न जाने हो हवाईजहाजको टिकटदेखि सबै कुरा महँगिन्छन् । 

मंगलबार युरोको भाउ पनि सोमबारको तुलनामा बढेको छ । मंगलबार युरो एकको खरिद दर १४० रुपैयाँ ०४ पैसा र बिक्री दर १४० रुपैयाँ ६७ पैसा पुगेको छ ।

यस्तै, बेलायती पाउण्ड एकको खरिद दर १६१ रुपैयाँ ५९ पैसा र बिक्री दर १६२ रुपैयाँ ३२ पैसा तोकिएको छ भने, कतारी रियालको मूल्य एकको खरिद दर ३६ रुपैयाँ ४५ पैसा र बिक्री दर ३६ रुपैयाँ ६१ पैसा रहेको राष्ट्र बैंकले जनाएको छ ।