काठमाडौं— उद्योग, वाणिज्य तथा आपूर्तिमन्त्री रमेश रिजालले सबै ग्यास उद्योगलाई उपभोक्ताको सुरक्षालाई प्राथमिकतामा राखेर ग्यास  बजारमा ल्याउन आग्रह गरेका छन् । 

मंगलबार काठमाडौंमा आयोजित नेपाल एलपी ग्यास उद्योग संघको २८औं वार्षिक साधारण सभालाई सम्बोधन गर्दै उनले यस्तो आग्रह गरेका हुन् ।

एलपी ग्यास सुरक्षाका दृष्टिले अत्यन्तै संवेदनशील वस्तु भएकाले सबै ग्यास उद्योगले आम उपभोक्ताको सुरक्षालाई प्राथमिकतामा राखेर उत्पादनलाई बजारमा ल्याउन मन्त्री रिजालले आग्रह गरे । 

उनले भने, ‘एलपी ग्यास सुरक्षाको दृष्टिले अत्यन्तै संवेदनशील वस्तु हो । सबै ग्यास उद्योगले आम उपभोक्ताको सुरक्षालाई प्राथमिकतामा राखेर आफ्नो उत्पादनलाई बजारमा ल्याउने छन् भन्ने विश्वास छ ।’

ग्यास उद्योगले राजस्व अभिवृद्धि र रोजगारी सिर्जना गरी आर्थिक क्षेत्रलाई चलायमान बनाउन ठूलो योगदान पुर्याएकाले सरकारले उद्योग व्यवस्थित गरी कारोबारलाई सर्वसुलभ बनाउन कानुनी र नीतिगत सुधार गर्ने उनले बताए ।

‘ग्यास उद्योगले राजस्व अभिवृद्धि र रोजगारी सिर्जना गरी आर्थिक क्षेत्रलाई चलायमान बनाउन ठूलो योगदान गरेका छन्’, मन्त्री रिजालले भने, ‘एलपी ग्यास उद्योग व्यवस्थित गरी कारोबारलाई सर्वसुलभ बनाउन सरकारले के कस्ता काुनी र नीतिगत सुधार गर्नुपर्छ, अवश्य गर्दै जाने छ ।’

उनले व्यावसायिक निष्ठालाई कायम राख्दै ग्यास उद्योगलाई व्यवस्थित र सुरक्षित उद्योगको रुपमा सञ्चालन गर्नुपर्नेमा जोड दिए ।