काठमाडौं— नेकपा एमालेका सचिव तथा सांसद योगेश भट्टराईले सार्वजनिक लेखा समितिले राष्ट्रिय मान्यता प्राप्त राजनीतिक दलका बैंक खाता हेर्न पाउनुपर्ने माग गरेका छन् ।

मंगलबार सिंहदरबारमा बसेको सार्वजनिक लेखा समितिको बैठकमा भट्टराईले नेपालका राजनीतिक दलहरू कसरी चलेका छन् भनेर थाहा पाउन उनीहरूको बैंक खाता सार्वजनिक लेखा समितिले हेर्न पाउनुपर्ने बताएका हुन् ।

उनले भने,‘दलहरू कसरी चलेका छन् ? यस आधारमा धेरै विषय प्रभावित हुन्छन् । राजनीतिक दलसम्बन्धी ऐन संशोधन हुँदैछ भन्ने सुनिन्छ । अब लेखा समितिले राष्ट्रिय दलको मान्यता प्राप्त दलको अकाउन्ट हेर्नुपर्छ । यसतर्फ गम्भीर बनौं ।’

समितिमा भएको बेरुजुमाथिको छलफलका क्रममा उनले निर्णयकर्ता मन्त्री र सचिव तथा कार्यान्वयन कर्तालाई समेत जिम्मेवार बनाउनुपर्ने बताए ।