काठमाडौं— कोशी प्रदेशको बजेट सोमबारदेखि शून्यतामा गएको छ । अध्यादेशबाट आएको बजेटको प्रतिस्थापन नहुँदा बजेट शून्यतामा गएको हो ।

बजेट शून्यतामा गएकाले नेकपा एमालेले अदालत जाने तयारी गरेको छ । बजेट शून्यताले कर्मचारीको तलब भत्तादेखि निजी क्षेत्रसँगको साझेदारीमा चल्ने कार्यक्रमसमेत प्रभावित हुने छन् ।

एमाले नेतृत्वको सरकारले अध्यादेशमार्फत ल्याएको बजेट असार १४ गते प्रदेश सभामा टेबुल भएको थियो । सभामा टेबुल भएको बजेटलाई ६० दिनभित्र प्रतिस्थापन विधेयक ल्याएर प्रतिस्थापन गर्नु पर्ने थियो । 

यसैबीच प्रतिस्थापन विधेयक संसद्मा टेबुलसम्म हुन नसक्दा कोशी प्रदेशमा बजेट शून्यता सुरु भएको हो ।