काठमाडौं— नेपाल शिक्षक महासंघले देशभरका शिक्षक तथा कर्मचारीलाई महासंघको आन्दोलनमा उपस्थित हुन आग्रह गरेको छ ।
शुक्रबार शिक्षा विधेयक सच्याउनुपर्ने माग राख्दै आन्दोलन घोषणा गरेको महासंघले आन्दोलनमा आउन सबै शिक्षक तथा कर्मचारीलाई आग्रह गरेको हो ।
महासंघले आइतबारदेखि आन्दोलन गर्नेगरी आन्दोलनका कार्यक्रम सार्वजनिक गरेको छ । महासंघकी अध्यक्ष कमला तुलाधरले पेसागत हकहितका लागि सरकारसँग लडाइँ भएकाले आन्दोलनमा उपस्थित भई सफल पार्न आग्रह गरिन् ।
उनले सरकारले शिक्षा विधेयक सच्याएर सबै शिक्षक तथा कर्मचारीका माग पूरा गर्नुपर्ने बताएकी छिन् । माग पूरा नभएसम्म आन्दोलन नरोकिने उनको भनाइ छ ।
पहिलो चरणको कार्यक्रम
१. पालिका कार्यालयमा धर्ना
२०८० साउन २८ गते आइतबार देशका हरेकमा पालिका कार्यालयमा सम्बन्धित पालिकाका शिक्षक तथा कर्मचारी उपस्थित भई ३ घण्टा (११ः०० बजे देखि २ः०० बजेसम्म) धर्ना दिने ।
धर्नाको समापन सँगै ३० बुँदे र ५१ बुँदे सहमतीका छायाप्रतिसहित केन्द्रबाट पठाएको जानकारीपत्र पालिका समक्ष पेसगर्ने ।
कार्यक्रमको संयोजन महासंघ र आबद्ध/सम्बद्ध संस्थाका पालिका समितिले गर्ने ।
जिल्ला समन्वय इकाइमा धर्ना
साउन ३० गते मंगलबार देशका हरेक जिल्लाको शिक्षा विकास तथा समन्वय इकाइमा सम्बन्धित जिल्लाका शिक्षक तथा कर्मचारी उपस्थित भई ३ घण्टा (११ः०० बजे देखि २:०० बजेसम्म) धर्ना दिने ।
धर्नाको समापन सँगै ३० बुँदे र ५१ बुँदे सहमतिका छायाप्रतिसहित केन्द्रबाट पठाएको जानकारी पत्र पेस गर्ने ।
कार्यक्रमको संयोजन महासंघको जिल्ला समिति तथा यसका आबद्ध/सम्बद्ध संस्थाका जिल्ला समितिले गर्ने ।
प्रदेशको सामाजिक विकास मन्त्रालयमा धर्ना
साउन ३२ गते मंगलबार सबै प्रदेशका महासंघ तथा यसका आबद्ध/सम्बद्ध संस्थाका प्रदेश समिति तथा जिल्ला समितिका पदाधिकारी तथा सदस्यहरू जम्मा भई प्रदेशको सामाजिक विकास मन्त्रालयमा ३ घण्टा (११ः०० बजे देखि २ः०० बजेसम्म) धर्ना दिने ।
धर्नाको समापन सँगै ३० बुँदे र ५१ बुँदे सहमतिका छायाप्रतिसहित केन्द्रबाट पठाएको जानकारी पत्र पेस गर्ने । कार्यक्रमको संयोजन महासंघको प्रदेश समिति तथा आबद्ध/सम्बद्ध संस्थाका प्रदेश समितिले गर्ने ।
संसद् सदस्यलाई जानकारी तथा पक्षीकरण
भदौ १ गते शुक्रबार सबै प्रदेश तथा संघीय सांसदसमक्ष सम्बन्धित जिल्लाका महासंघ तथा आबद्ध/सम्बद्ध संस्थाका नेतृत्वले ३० बुँदे र ५१ बुँदे सहमतिका छायाप्रति बुझाउँदै संघीय शिक्षा ऐन निर्माणमा विद्यालय शिक्षा र शिक्षक–कर्मचारीका मागमुद्दाको पक्षीकरणमा सहयोग गर्न आग्रह गर्ने ।
केन्द्रमा पक्षीकरण
यो अवधिमा महासंघ राष्ट्रिय समिति तथा आबद्ध/सम्बद्ध संस्थाको मुख्य नेतृत्वले नेपाल सरकार, राजनीतिक दलका मुख्य नेता, संसदीय दलका प्रमुख सचेतक, संसदको शिक्षा, स्वास्थ्य र सूचना प्रविधि समितिका सांसदहरुसँग अन्तरक्रिया, भेटघाट, छलफल तथा पक्षीकरण गर्ने ।
दोस्रो चरण
काठमाडौंमा बृहत् प्रदर्शन
नयाँ संघीय शिक्षा संसदमा दर्ता भएको पाँचौं दिनबाट देशभरिका शिक्षक तथा कर्मचारी उपस्थित भई काठमाडौंमालगातार बृहत् विरोध प्रदर्शन गर्ने ।
