तलब माग गर्दै ईसीडी शिक्षकले सुरु गरे धर्ना
काठमाडौं— कञ्चनपुरको भीमदत्त नगरपालिकाअन्तर्गत सामुदायिक विद्यालयमा कार्यरत प्रारम्भिक बालविकास सहजकर्ता (ईसीडी शिक्षक) ले दश महिनादेखि तलब नपाएको भन्दै आन्दोलन सुरु गरेका छन् ।
गत आर्थिक वर्ष २०७९/८० मा दुई महिनाको मात्रै तलब पाएको शिक्षकहरूले बताएका छन् । उनीहरूले सोमबारदेखि पालिकामै धर्ना दिएका छन् ।
बालविकास शिक्षक भीम नगरकी अध्यक्ष विन्दु विष्टले वृद्धि गरिएको तलब पटक–पटक माग गर्दा पनि पालिकाले नदिएपछि बाध्य भएर धर्ना दिनु परेको जानकारी दिइन् ।
उनी भन्छिन्,‘अधिकारको लागि धर्नामा बस्न बाध्य छौं । माग पूरा नभएसम्म धर्ना जारी रहन्छ ।’
बालविकास शिक्षक लक्ष्मी पाण्डेयले बालविकास शिक्षकमाथि पालिकाले चरम श्रमशोषण गरेको बताइन् ।
उनले भनिन्,‘पालिकाले वृद्धि भएको हाम्रो पारिश्रमिक दिएको छैन । आफूले काम गरेको पैसा पाउन पनि आन्दोलन गर्नु परेको छ ।’
प्रकाशित मिति: बिहीबार, साउन २५, २०८० ०९:३४
थप समाचार
