काठमाडौं— गत १० गतेदेखि अवरुद्ध भएको प्रतिनिधि सभा बैठकको गतिरोध हटाउन बसेको शीर्ष नेताहरूको छलफल निष्कर्षविहीन भएको छ ।
सभामुख देवराज घिमिरेले सोमबार प्रमुख तीन दलका शीर्ष नेता र सचेतकलाई आह्वान गरेसँगै बैठक सुरु भएको थियो । बैठकमा कुनै सहमति नभएको नेपाली कांग्रेसका प्रमुख सचेतक रमेश लेखकले बताए ।
नेताहरूबीच सहमति जुट्न नसकेपछि १ बजे बोलाइएको प्रतिनिधि सभाको बैठक सूचना टाँसेर ४ बजेसम्म स्थगित गरिएको छ ।
सुन तस्करी प्रकरणमा उच्च स्तरीय छानबिन समिति गठनको माग गर्दै एमालेले सदन अवरूद्ध गर्दै आएको छ ।
यसैबीच, सोही बैठकले संसदीय समिति सभापतिको भागबण्डा टुंगो लगाएको छ । बैठकमा सहभागी नेपाली कांग्रेसलाई ४, प्रमुख प्रतिपक्षी दल नेकपा एमालेलाई ३, माओवादी केन्द्रलाई २, नेकपा एसलाई १, जनता समाजवादी पार्टीलाई १ र जनमत पार्टीलाई १ समिति परेको छ ।
भागबण्डामा राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)लाई कुनै समितिको जिम्मेवारी दिइएको छैन ।
