दाङ— जिल्लाको घोराही उपमहानगर–१४ झिँगौराका लोकेन्द्र रोकामगर विगत नौ वर्षदेखि व्यावसायिक फूल खेतीमा लाग्दै आएका छन् । वैदेशिक रोजगारीलाई बिट मार्दै स्वदेशमै स्वरोजगार हुने उनको योजना फूल खेतीबाट पूरा भएको छ ।
‘फूल खेतीबाट हुने आम्दानी राम्रो छ, सिजनमा लाखौँको फूल बिक्री भइरहेको छ,’ उनले भने । फूल खेतीबाट आम्दानी राम्रो हुन थालेपछि काम खोज्दै विदेश जान नपरेको उनको भनाइ छ ।
रोजगारीका क्रममा सात वर्ष कतारमा बिताएका रोका मगरले दशैँ र तिहारलगायतका पर्व एवं शुभकार्यमा फूलको माग राम्रो देखेपछि फूल खेतीमा लागेका थिए । हाल उनले हजारीका बिरुवा उत्पादन गर्दै बिक्री गरिरहेका छन् ।
हजारीका बिरुवा घोराहीसहित तुलसीपुर, लमही, नारायणपुरका साथै कपिलवस्तु र सुर्खेतसम्म पुर्याउँछन्, उनी । थोकमा एउटा बिरुवाको साढे तीन र खुद्रामा पाँच रुपैयाँसम्म बिक्री गर्ने गरेको उनको भनाइ छ । उनले गत तिहारमा मात्रै १० लाखको हजारी फूलका माला र फूल बिक्री गरेको बताए ।
दुई बिघा जग्गा भाडामा लिएर फूल खेती गरेका उनले अहिले भारतको कोलकाताबाट अफ्रिकन मेरीगोल्ड जातको सयपत्रीको बीउ ल्याएका छन् ।
‘काठमाडौँतिर व्यावसायिक फूल खेती भए पनि दाङमा नभएकाले फूल खेती सुरु गरेको हुँ,’ उनले भने, ‘घोराही बजार नजिकै भएकाले बजारको कुनै समस्या छैन ।’ पहिले तिहारका लागि मात्रै सयपत्री फूल उत्पादन गर्ने भए पनि हाल बाह्रै महिना माग हुने गरेको उनको भनाइ छ ।
अहिले उनले सजावटका लागि फूलका बिरुवा, उत्पादन तथा बिक्रीसमेत गर्दै आएका छन् । फूलको माग दसैँ तिहारमा बढी हुने गरेको उनको भनाइ छ । यसै गरेर विभिन्न औपचारिक कार्यक्रम, विवाह, पूजाआजाका लागि फूलको माग हुने गरेको बताए ।
