नयाँ दिल्ली— भारतको हरियाणाको नुहमा सोमबार विश्व हिन्दू परिषद् र मातृशक्ति दुर्गा वाहिनीले निकालेको ब्रजमण्डल यात्रामा झडप भएको छ । दुई समूहबीच झडप भएपछि ४० बढी सवारीसाधनमा आगजनी भएको छ । प्रहरीमाथि पनि ढुंगामुढा भएको थियो ।
यस क्रममा धेरै मानिस र प्रहरी घाइते भएका छन् । गोली लागेर दुई जनाको मृत्यु भएको भारतीय सञ्चारमाध्यमले जनाएका छन् ।
नुह जिल्ला प्रशासनले स्थितिलाई नियन्त्रण गर्न अन्य जिल्लाबाट प्रहरी बोलाएको छ भने पूरै जिल्लामा इन्टरनेट पनि बन्द गरिएको छ । जिल्लाको सिमाना सिल गरिएको छ ।
नुहको नल्हाद शिव मन्दिरबाट सुरु भएको ब्रजमण्डल यात्रा फिरोजपुर–झिरकातर्फ गएको थियो । यात्रा तिरंगा पार्क नजिक पुगेपछि त्यहाँ मानिसको भीड लागेको थियो । आमनेसामने हुनासाथ दुई पक्षबीच झगडा र ढुंगा हानाहान सुरु भएको थियो ।
झडपका क्रममा बस पार्क र राजमार्गमा राखिएका ४० भन्दा बढी सवारीसाधनमा आगजनी र तोडफोड गरिएको थियो ।
