काठमाडौं— नेकपा एमालेका महासचिव शंकर पोखरेलले, राष्ट्रिय स्वतन्त्र पार्टी (रास्वपा) राष्ट्रिय दलका रूपमा उदाएपछि विदेश जाने दर ह्वात्तै बढेको आरोप लगाएका छन् ।
मंगलबार सामाजिक सञ्जाल फेसबुकमार्फत उनले विदेश गएकाहरूलाई देश फर्काउँछौँ भन्नेहरू राष्ट्रिय दलको उदयपछि विदेशिने संख्या झनै बढेको बताए ।
उनले भनेका छन्, ‘नेकपा (एमाले) सरकारमा आउँदा रोजगारीका लागि विदेशमा जाने घट्ने र सरकारबाट हट्दा बढ्ने तथ्यले देश बनाउन सक्ने पार्टी नेकपा (एमाले) हो भन्ने जनविश्वासलाई उजागर गर्दछ । तर तथ्यहीन रुपमा पुराना पार्टीका कारणले विदेशिने बढे भनेर नेकपा (एमाले)लाई समेत जोड्ने प्रयास गर्नु कुप्रचार हो। विदेशमा गएकाहरूलाई देश फर्काउँछौ भन्नेलाई गएको निर्वाचनमा जनताले लोकप्रिय मत दिए । तर उनीहरु राष्ट्रिय पार्टीका रुपमा नेपाली राजनीतिमा उदयपछि नै विदेशिनेको संख्या झनै बढ्यो । के यसको जिम्मेवारी नेकपा (एमाले)ले नै लिनुपर्ने हो र ?’
रास्वपाका सभापति रवि लामिछानेले गत मङ्सिरमा सम्पन्न प्रतिनिधिसभाको पूर्वसङ्घारमा विदेशमा रहेका नेपालीलाई स्वदेश फर्काउने अभियान चाल्ने घोषणा गरेका थिए ।
