काठमाडौं— नुवाकोटको ककनी गाउँपालिका र धादिङकाे धुनीबेँसी—१ वासीले काठमाडौं उपत्यकाको फाेहोर विसर्जनमा रोक लगाएका छन् । उनीहरूले सोमबार बिहानैदेखि ककनी गाउँपालिका र धुनीबेँसीको सीमानामा अवरोध गरेका हुन् ।
स्थानीयको अवरोधका कारण काठमाडौंबाट फोहोर बोकेर गएका कन्टेनर बाटामै रोकिएका छन् । ककनी–३, ५ र धुनीबेँसी–१ का स्थानीय विरोध प्रदर्शनमा उत्रिएपछि सुरक्षाकर्मीको उपस्थिति बढाइएको छ ।
मानव बस्तीसँगै फोहोर नराख्न पटक-पटक अनुरोध गर्दा पनि सरकाले अटेरी गरेपछि अवरोध गर्न बाध्य भएको स्थानीयको भनाइ छ ।
ककनी—५ का दलबहादुर सुनारले कहिलेसम्म महामारीसँग जुधिरहनुपर्ने ? भन्दै प्रश्न गरे । उनले मानव जीवनभन्दा ठूलो केही हुन नसक्ने बताए ।
ककनी गाउँपालिकाले फोहोरका कन्टेनरको प्रवेश शुल्क उठाउने तयारी गरेको थियो । आज साउन १ गतेदेखि ठूला प्रतिगाडीलाई एक हजार पाँच सय र सानालाई एक हजार रुपैयाँ लिने तयारी गरेको थियो ।
