विराटनगर— कोशी प्रदेशको नामकरण खारेजीको माग गर्दै जारी आन्दोलनका क्रममा विराटनगरमा झडप हुँदा दुई दर्जन बढी घाइते भएका छन् ।
आन्दोलनका क्रममा मंगलबार पहिचान पक्षधर र प्रहरीबिच झडप हुँदा आन्दोलनकारी र प्रहरी गरी दुई दर्जन बढी घाइते भएका छन् । झडपमा परी डेढ दर्जन बढी आन्दोलनकारी घाइते भएको मोरङ प्रहरी प्रमुख एसपी दीपक खरेलले जानकारी दिए । प्रहरीका अनुसार सशस्त्र प्रहरी र नेपाल प्रहरीका ३/३ जना घाइते भएका छन् ।
झडपका क्रममा रबरको गोली लागेर मोरङका सुरज राई घाइते भएका छन् भने, मोरङको ग्रामथान-६ का २१ वर्षीय सुरज राईलाई दाहिने खुट्टामा रबरको गोली लागेको छ । यस्तै सुनसरी, धरान-१२ का किराँत राष्ट्रिय मोर्चाका केन्द्रीय उपाध्यक्ष ४१ वर्षीय अशोक राई घाइते भएका छन् ।
यसैगरी सुनसरी धरानकै २२ वर्षीय उदय लिम्बूकाे दाहिने खुट्टामा चोट लागेको छ भने इटहरी-५ का २६ वर्षीय पदम केरुङको देब्रे हातको कुहिनोमा चोट लागेको छ । सुनसरी, धरान-१६ का ५१ वर्षीय शिव आङदेम्बेकाे टाउकोमा गम्भीर चोट लागेको छ । धरानकै ४८ वर्षीय ज्ञानप्रकाश राईको, धरान-५ का ४६ वर्षीय एक के दर्नाल, २५ वर्षीय विशाल राईको टाउकोमा चोट लागेको छ । उनीहरूलाई विराटनगरको पारस अस्पतालमा प्राथमिक उपचारपछि धरान घोपा पठाइएको छ ।
आन्दोलनकारीले प्रहरीको घेरा तोड्दै प्रहरीमाथि ढुंगामुढा प्रहार गर्न थालेपछि प्रहरीले पानीको फोहरा र तीन दर्जन अश्रुग्याँस प्रहार गरेको पोखरेलले बताए । आन्दोलन शान्त पार्न ठुलो संख्यामा प्रहरी परिचालन गरिएको थियो । केही समयअघि तनावग्रस्त बनेको विराटनगरको रोडशेष चौक क्षेत्र अहिले शान्त भएको प्रहरीले जनाएको छ ।
विराटनगरको मुख्यमन्त्री कार्यालय नजिक रहेको बिग होटलमा दिगो विकास लक्ष्य प्राप्तिका लागि स्रोत व्यवस्थापनसम्बन्धी अन्तरक्रियात्मक कार्यशालामा सहभागी हुन आएका सांसदहरूलाई दबाब दिन भन्दै पहिचान पक्षधरहरु त्यहाँ पुगेका थिए ।
होटलमा सांसदहरू भेला भएर अन्तरक्रिया गरिरहेको अवस्थामा आन्दोलनकारीहरू त्यहाँ पुगेर तोडफोड गरेका थिए । आन्दोलनका क्रममा आन्दोलनकारीले उक्त होटलको सीसाहरूमा क्षति पुर्याएको बताइएको छ ।
