काठमाडौं— नेपाल विद्यालय कर्मचारी परिषद् राष्ट्रिय समिति, कर्मचारी युनियन र कर्मचारी संघ संयुक्त विद्यालय कर्मचारी आन्दोलन–२०८० र नेपाल सरकारबीच आइतबार सिंहदरबारमा बसेको तेस्रो बैठक सकिएको छ ।
तलब, सेवासुविधा र पेसागत स्थायित्वको माग गर्दै एक महिना बढीदेखि काठमाडौंमा विद्यालय कर्मचारीले आन्दोलन गरिरहेका छन् ।
आज आइतबारको बैठकमा कर्मचारीका मागका विषय सरकारी वार्ता टोलीले प्रतिवेदन तयार गरेको छ ।
प्रतिवेदनमाथि विद्यालय कर्मचारीको वार्ता टोलीले रायसुझाव दिएको विद्यालय कर्मचारी परिषद् राष्ट्रिय समितिका महासचिव शान्तिनाथ योगीले न्यूजगृहलाई जानकारी दिए । उनी भन्छन्,‘हाम्रा मागका विषयमा सरकारी वार्ता टोलीले प्रतिवेदन तयार गरेको छ । प्रतिवेदनमाथि हामीले रायसुझाव दिएका छौं ।’
अर्थ मन्त्रालयसहिले उक्त प्रतिवेदन अध्ययन गरेर केही दिनमा विद्यालय कर्मचारीलाई वार्तामार्फत जानकारी गराउने छ ।
महासचिव योगी भन्छन्,‘चित्तबुझ्दो जवाफ आएन भने आन्दोन जारी नै रहन्छ । कडा आन्दोलन हुन्छ । यसको जिम्मा राज्यले लिनुपर्छ ।’
