काठमाडौं— सामुदायिक विद्यालयमा कार्यरत प्रारम्भिक बालविकास सहजकर्ता (ईसीडी शिक्षक) ले सरकारले नै तोकेको न्यूनतम तलब मासिक १७ हजार रुपैयाँ पनि नपाएको गुनासो गरेका छन् ।
न्यूजगृहसँग विभिन्न पालिकाका ईसीडी शिक्षकहरुले तलब नपाएको सूचना दिएका हुन् ।
नियमअनुसार संघीय सरकारबाट १० हजार रुपैयाँ र स्थानीय तहबाट ७ हजार गरी जम्मा १७ हजार रुपैयाँ पाउनुपर्ने हुन्छ । तर अधिकांश स्थानीय तहले अति न्यून तलब दिँदा ईसीडी शिक्षकहरुलाई दैनिक गुजारा चलाउन कठिन भएको छ ।
एक जना ईसीडी शिक्षक भन्छिन्,‘संघीय सरकारले १० हजार रुपैयाँ र स्थानीय सरकारले ७ हजार रुपैयाँ दिनुपर्ने नियम सुनिन्छ । तर हामीले पाएका छैनौं । कतै १२ हजार, कतै १० हजार र कतै १७ हजार रुपैयाँ तलब पाएको साथीहरुले बताउनु हुन्छ ।’
संघीय सरकारले बजेट निकासा गरे पनि स्थानीय सरकारले आन्तरिक स्रोत कमजोर हुँदा तोकिएको तलब दिन नसकिएको बताएका छन् । तर कतिपय स्थानीय तहले संघीय सरकार सरह १० हजार रुपैयाँमा १० सै हजार थप गरी मासिक २० हजार रुपैयाँ दिएका छन् ।
देशभरका ईसीडी शिक्षकहरूले प्रा.वि तह सरह तलब,सेवासुविधा माग गर्दै आएका छन् ।
