काठमाडौं— नेकपा माओवादी केन्द्रका सांसद लेखनाथ दाहालले प्रधानमन्त्री पुष्पकमल दाहाल प्रचण्डले राजीनामा दिनुपर्ने गरी कुनै राष्ट्रघात नगरेको बताएका छन् ।
बुधबार प्रतिनिधि सभा बैठकमा प्रमुख प्रतिपक्ष दल नेकपा एमालेले प्रधानमन्त्रीको राजीनामा माग गरी संसद् अवरोध गरेपछि सञ्चारकर्मीसँग बोल्दै उनले एमालेले सरकार बाहिर बसेको पीडा अभिव्यक्त गरेको बताए ।
उनले सरकार अंकगणितले बन्ने र बहुमत गुमाएको दिन स्वतःराजीनामा हुने भन्दै अहिले नै राजीनामा दिनलाई कुनै राष्ट्रघाती सन्धि नगरिएको बताए । उनले प्रतिपक्ष दलले जस्तो देश नबेचेको पनि बताए ।
‘एमाले सरकार बाहिर बसेको कारणले उहाँहरुलाई ठूलो पीडा छ । आवेग छ । त्यो आवेग अभिव्यक्त हुन्छ । प्रधानमन्त्रीको जवाफ माग गरेको भएहुन्थ्यो । राजीनामा जो माग गर्नुभयो, उहाँहरुलाई थाहा रहेनछ, सरकार कसरी बन्छ । सरकार अंकगणित हिसावले बन्छ । जुनदिन यो सरकारले बहुमत गुमाउँछ, त्यो दिन स्वतः राजीनामा हुन्छ ।’
