काठमाडौं— सत्तारुढ नेपाली कांग्रेसका सांसद एवम् पूर्वअर्थराज्यमन्त्री उदयशमशेर राणाले प्रधानमन्त्री पुष्पकमल दाहाल प्रचण्डले भारतीय नागरिक प्रितम सिंहबारे दिएको अभिव्यक्ति गलत रहेको टिप्पणी गरेका छन् ।
पुस्तक ‘रोड्स टु द भ्याली स् द लिगेसी अफ सरदार प्रितम सिंह इन नेपाल’ विमोचन कार्यक्रममा सोमबार दाहालले विवादास्पद अभिव्यक्ति दिएका थिए । ‘उहाँ (सिंह) ले एक पटक मलाई प्रधानमन्त्री बनाउन धेरै मिहिनेत गर्नुभयो । धेरैचोटि दिल्ली जानु पनि भयो । काठमाडौंमा नेताहरू–साथीहरूसँग लगातार छलफल गर्नुभयो,’ दाहालले भनेका थिए ।
बुधबार प्रधानमन्त्रीको सोही अभिव्यक्तिलाई लिएर एमालेसहितका विपक्ष दलहरुले राजीनामा माग गर्दै संसद बैठक अवरुद्ध पारेका थिए ।
साेही सन्दर्भमा संघीय संसद् भवन परिसरमा सञ्चारकर्मीले राखेका जिज्ञासाको जवाफ दिने क्रममा सांसद राणाले प्रधानमन्त्री दाहालले सो विषयबारे संसदमा चाँडोभन्दा चाँडो स्पष्टीकरण दिनुपर्ने माग गरे ।
सांसद राणाले भने,‘हाम्रो यस सन्दर्भमा अफिसियल धारणा छैन । प्रधानमन्त्रीजीले पुस्तक विमोचन गर्ने बेलामा केही कुरा बोल्नु भएको थियो । त्यसको बारेमा उहाँहरुले आपत्ति जनाउनु भयो । सायद भोलि प्रधानमन्त्रीले त्यसको जवाफ दिनुहुन्छ । हाउसलाई हामी अगाडि बढाउँछौं । एमालेले राजीनामा खोज्यो । उहाँले त्यो बोल्न नहुने हो । के सोचमा उहाँले बोल्नुभयो । अथवा के ब्याकराउण्डमा उहाँले त्यो बोल्नुभयो । त्यो चाहीँ स्पष्ट पार्नुपर्छ उहाँले ।’
सांसद राणाले आफ्नो पार्टी तत्काल सरकार परिवर्तन गर्ने पक्षमा भने नरहेको बताए ।
