सप्तरी— गुणस्तरहीन सिमेन्ट बिक्री गरेको आरोपमा प्रहरीले मारुती सिमेन्ट उद्योगका व्यापार प्रबन्धक ज्योति जोशीलाई पक्राउ गरेको छ । 

जोशीलाई विराटनगरबाट पक्राउ गरी सप्तरी ल्याइएको हो ।

मारुती सिमेन्ट उद्योगका सञ्चालक नन्दकिशोर राठी र प्रबन्ध निर्देशक अनुज राठीसहित सात जना फरार छन् । आपराधिक विश्वासघात मुद्दामा उनीहरूविरुद्ध पक्राउ पुर्जी जारी भएको छ ।

राजविराज नगरपालिका–४ का दिवाकर साहको जाहेरीका आधारमा जोशी पक्राउ परेका हुन् । जोशीलाई ५  दिन थुनामा राखेर अनुसन्धान गर्न अदालतले प्रहरीलाई अनुमति दिएको छ । 

मारुती सिमेन्ट प्रयोग गरी घर बनाउँदा भर्‍याङ भत्किएपछि सिमेन्ट गुणस्तरहीन भएको आरोप लगाउँदै साहले जिल्ला प्रहरी कार्यालयमा जाहेरी दिएका थिए ।