काठमाडौं— नेपाल विद्यालय कर्मचारी परिषद् राष्ट्रिय समितिका अध्यक्ष गंगाराम तिवारीले प्रधानमन्त्री पुष्पकमल दाहाल प्रचण्डलाई खुलापत्र लेख्दै आफूहरूका माग तत्काल पूरा नभए अवस्था सोचेभन्दा भिन्न हुने चेतावनी दिएका छन् ।
विद्यालय कर्मचारीका माग पूरा गर्न सहमति गर्ने, प्रतिबद्धता जनाउने तर कार्यान्वयन नगरेर झुक्याउने खेलमा सरकार लागेको भन्दै अध्यक्ष तिवारीले अब मार र मरको अन्तिम लडाइँको तयारीमा रहेको जानकारी गराएका छन् ।
शुक्रबार बिहान सामाजिक सञ्जालमार्फत अध्यक्ष तिवारीले प्रधानमन्त्रीलाई खुलापत्र लेख्दै भनेका छन्,‘सम्माननीय प्रधानमन्त्रीज्यू, सामुदायिक विद्यालयका कर्मचारीहरु विगत १ महिनादेखि माइतीघर घामपानी नभनी आफ्नो कामको सेवासुविधा दिनु भन्दै बसेका छौं । हजुर कर्मचारीका मागमुद्दाका विषयमा जानकार हुनुहुन्छ । हामीले भेट गर्दा ‘बुझेको छु समस्या छ यो समस्या समाधान गर्नेछु’ भनेर प्रतिबद्धतासमेत दिनुभएको हो । तर खै त सम्बोधन गर्नुभएको ? सडक र सदनमा यत्तिको आवाज बुलन्द रूपमा उठान हुँदासमेत सम्बोधन गर्न किन आनाकानी भएको छ ? अब हामी विद्यालय कर्मचारीहरू मार वा मरको अन्तिम लडाइँको तयारीमा छौं । तर त्यस्तो वातावरण आउन दिनुहुन्न भन्ने अपेक्षा राखेको छु। ल अर्थ मन्त्रीले बुझ्नु भएन, हजुरले त बुझ्नु भएको विषय हो नि । हामी सबै राजनीति दलका उच्च नेतृत्वलाई भेटघाट गरेर भ्याइयो । अब हामी अन्तिम तयारी गर्दै छौं । आशा छ,आजभोलि नै हाम्रा मुद्दालाई सम्बोधन गर्नु हुनेछ । गंगाराम तिवारी अध्यक्ष नेपाल विद्यालय कर्मचारी परिषद् तथा संयुक्त आन्दोलन समिति २०८० ।’
अध्यक्ष तिवारीले पटक–पटक प्रधानमन्त्री दाहाललाई भेटेर ध्यानाकर्षण गराएका तस्बिरहरूसमेत पोस्ट गरेका छन् । कर्मचारीहरूले तलब, सेवासुविधा र पेसागत स्थायित्वको माग गरेका छन् ।
