काठमाडौं— बझाङमा मंगलबार जीप दुर्घटना हुँदा सुदूरपश्चिम प्रदेशका कानुनमन्त्री पृथ्वीबहादुर सिंह सहित तीन जनाको मृत्यु भएको छ ।
मन्त्री सिंहकी पत्नी अमृता सिंह र आफन्त जयादेवी सिंहको बझाङमै यसअघि नै मृत्यु भएको थियो ।
मन्त्री सिंहको कोहलपुर मेडिकल कलेजमा उपचारको क्रममा साँझ ५:३३ मा मृत्यु भएको सुदूरपश्चिम प्रदेश प्रहरी कार्यालयका प्रहरी उपरीक्षक (एसपी) श्याम चौधरीले जानकारी दिए ।
दुर्घटनामा घाइते मन्त्री सिंह, उनका अंगरक्षक प्रहरी सहायक हवल्दार दीपक भण्डारी र चालक धर्मराज जोशीलाई थप उपचारका लागि नेपाली सेनाको हेलिकोप्टरबाट कोहलपुर मेडिकल कलेजमा लगिएको थियो । प्रहरी सहायक हवल्दार भण्डारी र चालक धर्मराज जोशीको उपचार भइरहेको छ ।
डडेल्धुराबाट बझाङ सदरमुकाम चैनपुरतर्फ आउँदै गरेको मन्त्री सिंह सवार सुपप्र ००१ झ ४८० नम्बरको जीप केदारस्यूँ गाउँपालिकाको बागथलामा दुर्घटनामा परेको हो ।
