काठमाडौं— पूर्वाञ्चल विश्वविद्यालय सेवा आयोगका अध्यक्ष महेशराज दाहाललाई कालोमोसो दलेर दुर्व्यवहार गर्ने नेपाल विद्यार्थी संघ (नेविसंघ)का नेतालाई प्रहरीले पक्राउ गरेको छ ।

बुधबार बिहान सुनसरी प्रहरीले मोरङको बूढीगंगाबाट नेविसंघ मोरङका सभापति सरोज पोखरेललाई नियन्त्रणमा लिएको हो ।

सुनसरी जिल्ला प्रहरी कार्यालय प्रमुख एसपी प्रभुप्रसाद ढकालले सेवा आयोगको जाहेरीका आधारमा पोखरेललाई नियन्त्रणमा लिएको जानकारी दिए । उनले भने, 'सेवा आयोगका अध्यक्षमाथि भएको दुर्व्यवहारमा नेतृत्व गर्ने नेविसंघ मोरङका सभापति सरोज पोखरेललाई पक्राउ गरेर अनुसन्धान प्रक्रिया अगाडि बढाएका छौँ । सेवा आयोगको जाहेरीअनुसार अरु ६/७ जनाको पनि खोजी भइरहेको छ ।'

पूर्वाञ्चल विश्वविद्यालयमा २२ वर्षपछि विज्ञापन खुलाएर कर्मचारी भर्ना प्रक्रिया अघि बढाएका सेवा आयोग अध्यक्ष दाहाललाई नेविसंघ, मोरङले दुर्व्यवहार गरेको हो।