काठमाडौं— प्रधानमन्त्री पुष्पकमल दाहाल प्रचण्डले नक्कली भुटानी शरणार्थी प्रकरणमा सत्ता स्वार्थको लागि कुनै पनि सम्झौता नगरी दृढताको साथ लागेर अन्तिम समयसम्म संघर्ष गर्ने बताएका छन् ।
बुधबार माओवादी नेता धनीराम पौडेलको चौथो स्मृति दिवसमा उनले नक्कली भुटानी शरणार्थी प्रकरणमा भ्रष्टाचारीको विरुद्धमा सुरुआतबाटै विभिन्न चुनौतीको समना गर्दै आएकोले कुनै सम्झौता नगरी अन्तिमसम्म लडाइँ लड्ने बताए ।
उनले भने, ‘थुप्रै जटिलटाको बीचमा हामी दृढताको साथ अगाडि बढेका छौँ । म डिआर पौडेलको स्मृतिदिवसमा के भन्न चाहान्छु भने हामी कुनै सम्झौता गर्नेछैनौँ । हामी अन्तिम समयसम्म संघर्ष गरिराख्ने छौँ ।’
उनले लामो समय संघर्ष गरेर ल्याएको परिवर्तन र उपलब्धिप्रति दक्षिणपन्थी कोणबाट प्रहार भइरहेको भन्दै परिवर्तनको रक्षा गर्नुपर्ने मुख्य जिम्मेवारी आफ्नो काँधमा रहेको बताए ।
‘तपाईं हामीले देख्या छौँ केही वर्षदेखि यो संघीय लोकतान्त्रिक गणतन्त्र, समावेशी समानुपातिक प्रणालीमाथि प्रहार भइरहेको छ दक्षिणपन्थी, प्रतिक्रान्तिकारी कोणबाटै भइरहेको छ । त्यसको रक्षार्थ हामीले प्रतिवाद गर्न विभिन्नखाले सहकार्य गठबन्धन बनाउँदै आयौँ । यो परिवर्तनको रक्षा मात्रै हैन सुदृढ गर्ने र जनतालाई महसुस हुनेगरी परिवर्तनको निम्ति संघर्ष गर्ने शक्ति नै जनता र राष्ट्रको पक्षमा इमान्दार र परिणाम दिन सक्ने हुन्छन् भनेर हामीले साबित गर्नुर्नेछ,’ प्रचण्डले भने ।
त्यस्तै, उनले सुशासन, सामाजिक न्याय र विकासको लागि दृढतापूर्वक काम गरिरहेको दाबी गर्दै जनता र राज्यको लागि इमान्दार परिणामुखी शक्ति साबित गर्नुपर्ने आवश्यकता रहेको समेत औँल्याए ।
