काठमाडौं— मधेस प्रदेश सभाको आकस्मिक बैठक मंगलबार बोलाइएको छ ।
मुख्यमन्त्री सरोजकुमार यादवले आकस्मिक रूपमा मंगलबारै विश्वासको मत पनि लिने तयारी गरेका छन् ।
मधेस प्रदेशको प्रदेश सभा बैठक आगामी जेठ ३२ गते बस्ने भनिएकोमा मंगलबार आकस्मिक रूपमा बैठक डाकेर मुख्यमन्त्री यादवले विश्वासको मत लिन लागेको नेपाली कांंग्रेसका प्रदेश सांसद कुमार कान्त झाले पुष्टि गरे ।
उनले भने, ‘मुख्यमन्त्रीको कार्यालयबाट प्रदेश सभाको आकस्मिक बैठकका लागि बेलुका ५ बजे आउनुहोस् भनेर सन्देश आएको छ ।’
सरकारलाई समर्थन दिएका कुनै दलले समर्थन फिर्ता लिएमा ३० दिनभित्र पुनःविश्वासको मत लिनुपर्ने कानुनी व्यवस्था छ ।
एमालेसहितका दलको समर्थनमा गत पुस २७ गते यादव मुख्यमन्त्रीमा नियुक्त भएका थिए । तर, एमाले गत चैत २१ गते मधेस सरकारबाट बाहिरिएको थियो भने जेठ १ गते समर्थन फिर्ता लिएको थियो । संवैधानिक व्यवस्थाअनुसार ३० दिनभित्र विश्वासको मत लिनुपर्ने भएपछि मंगलबार ३०औँ दिनको दिन आकस्मिक बैठक बोलाएर मुख्यमन्त्रीले विश्वासको मत लिन लागेका हुन् ।
