काठमाडौं— नेकपा एमाले अध्यक्ष केपी शर्मा ओलीले सुनैसुनले ढाकिएको देखिने गरी फोटो सामाजिक सञ्जालमा ट्रोल गरिएकोमा गुनासो गरेका छन् ।

औंठी लगाउने रुचि समेत नभएको मान्छेलाई जिउभरी सुनैसुनले डाकिएको फोटो सामाजिक सञ्जालमा ट्रोल गरेर झुटको खेती गरेको भन्दै उनले आपत्ति समेत जनाए । बुधबार च्यासलस्थित पार्टी केन्द्रिय कार्यालयमा अध्यक्ष ओलीले आफूले आमा बित्दा र एक पटक साथीले दिएको औंठी केही समय लगाएको तर त्यसबाहेक आफूले सुनको औंठी नलगाएको पनि पटकपटक बताए ।  ‘केपी ओलीको फोटोमा हातभरि सुनैसुनका, यता पनि सुनैसुनका बोकी नसक्नु । त्यति सुन म बोक्न पनि सक्दिनँ होला । तर मेरो शरीरमा सुन भन्ने कुरा मैले जिन्दगीमा औंठी लगाएको छैन,’ ओलीले भने ।  

उनले त्यो सत्यलाई बङ्ग्याएर सुनैसुनले ढाकेको आफ्नो फोटो सामाजिक सञ्जालमा ट्रोल गरिनु आपत्तिजनक रहेको बताए । आफूसँग भएको ज्ञान, कला र क्षमताको दूरुपयोग गरेर यस्तो खालको गतिविधि गरिनु मुलुकका लागि दुःखको कुरा भएको पनि अध्यक्ष ओलीले बताए ।