काठमाडौं— संघीय संसद्को संयुक्त बैठकमा सोमबार आगामी आर्थिक वर्षको बजेट प्रस्तुत गर्दै अर्थमन्त्री डा. प्रकाशशरण महतले औद्योगिक क्षेत्रको स्तरोन्नतिका लागि ३३ करोड रुपैयाँ विनियोजन गरिएको बताएका छन् । 

अहिले सञ्चालनमा रहेका १० वटा औद्योगिक क्षेत्रको स्तरोन्नतिका लागि उक्त बजेट विनियोजन गरिएको हो । ‘सरकारबाट घोषणा भएका औद्योगिक क्षेत्र, विशेष आर्थिक क्षेत्र औद्योगिक ग्रामको पूर्वाधार निर्माण तीव्रता दिइनेछ,’ बजेट प्रस्तुत गर्दै उनले भने, ‘चितवनको शक्तिखोर र मकवानपुरको मयुरधाप औद्योगिक क्षेत्रको वातावरण प्रभाव मूल्यांकन, रुख कटान लगायत पूर्वतयारी सम्पन्न गरी सार्वजनिक, निजी साझेदारीमा विकास तथा सञ्चालन गर्न निजी क्षेत्रलाई प्रोत्साहित गरिनेछ ।’