काठमाडौं— नेपाल समाजवादी पार्टी (नेसपा) का अध्यक्षसमेत रहेका पूर्वप्रधानमन्त्री डा.बाबुराम भट्टराईले भारतसँगको सबै समस्यालाई एकमुष्ट समाधानमा जोड दिनुपर्ने बताएका छन् ।
प्रधानमन्त्री पुष्पकमल दाहाल प्रचण्डको बुधबार (१७ जेठ) हुने भारत भ्रमणका क्रममा आइतबार सिंहदबारमा पूर्वप्रधानमन्त्री, दलका नेताहरूसँग भएको छलफलमा डा.भट्टराईले सो सुझाव दिएका हुन् ।
सञ्चारकर्मीसँग डा.भट्टराईले भने,‘छिमेकीसंँग राम्रो सम्बन्ध बनाउनको लागि विश्वासको पाटो प्रमुख हो । मैले के सुझाव दिएको छु भने हाम्रो सीमा समस्या छन् । खुल्ला सीमाना छन् । यी सबैलाई एकमुष्ट समाधान गर्नको लागि मेरो पालामा सुरु भएको ईपीजी हो । यो के कारणले रोकिएको त्यो बुझ्नुपर्छ ।’
पूर्वप्रधानमन्त्री डा.भट्टराईले भारतले विभिन्न आयोजना परियोजनाहरू बनाइदिन्छु भनेर राख्ने तर नबनाउनेतर्फ पनि ध्यान दिनुपर्ने बताए ।
