काठमाडौं— नेकपा एमाले संसदीय दलका उपनेता सुवास नेम्वाङले पशुपतिनाथमा पितलको जलहरी चढाएर एमालेका अध्यक्ष केपी शर्मा ओलीले भ्रष्टाचार गरेको भन्ने सत्ता पक्षबाट लागेको आरोपको छानबिनका लागि माग गरेका छन् । 

शुक्रबार प्रतिनिधि सभाको बैठकमा उनले सत्ता पक्षले लगाएको आरोप टाउकोमा बोकेर सदनमा भाग लिन नसक्ने भन्दै माफी माग्न लगाउन माग गरेका हुन् । 

उनले भने, ‘प्रतिपक्षको हाम्रो जिम्मेवार नेतामाथि लागेको कुरा गैरजिम्मेवार छ । सुनको जलहरीको नाममा पशुपतिनाथमा पितलको जलहरी चढाएर भ्रष्टाचार गर्ने काम भएको छ । यो यति गम्भीर आरोप लागेको छ । सत्ता पक्षले यस्तो आरोप लगाएको छ । यो टाउकोमा बोकेर कसरी भाग लिन सक्छौँ हामी । दूधको दूध पानीको पानी होस् । यो छानबिन गरेर टुङ्गोमा पुर्‍याऊँ । सम्पूर्ण कुरा सफा भएपछि मात्र हाउसमा बसौँ ।’