कञ्चनपुर — ‘ढोग दिया’ शब्दको दुरूपयोग भएकोप्रति देउडा संस्कृति संरक्षण प्रतिष्ठानले आपत्ति प्रकट गरेको छ ।
प्रतिष्ठानका अध्यक्ष धु्रवबहादुर सिंहले सुदूरपश्चिमको मौलिक संस्कार, भाषा–संस्कृतिलाई होच्याउने खालका गीत सङ्गीतप्रति आपत्ति प्रकट गरेक हुन् । प्रेस विज्ञप्ति जारी गर्दै उनले भूगोल विशेष क्षेत्र, सम्प्रदाय, जातजाति तथा समुदायसँग जोडिएको मौलिक कला संस्कृति, परम्परालाई अपमानित गर्ने खालका गीत सङ्गीत प्रसारणमा रोक लगाउनका लागि सम्बन्धित निकायसँग माग गरेका छन् ।
काली–कर्णालीको मौलिक संस्कार र सभ्यतासँग जोडिएका ओजपूर्ण शब्दहरूलाई शिष्टताको खिल्ली उडाउने र अपहेलित गराउने कार्य तत्काल बन्द हुनुपर्ने उनको भनाइ रहेको छ । संस्कृति र परम्परालाई अपमानित गर्ने खालका सामाजिक सञ्जालमा प्रकाशन, प्रसारण हुँदै आएका अपाच्य गीत सङ्गीत तथा विषयवस्तु प्रकाशन प्रसारण गर्ने र तयार गर्नेहरूमाथि उनले कारबाहीको माग गरेका छन् । सुदूरपश्चिम प्रदेशमा मान्यजनको आदर गर्दै खुट्टामा दण्डवत् प्रणाम गरी आर्शिवाद लिने कार्यलाई ढोग दिने भनिन्छ ।
‘नमस्ते ढोग दिया’बोलको म्युजिक भिडिओ केहीदिन अघि सार्वजनिक भएको हो। गीतमा कविता खत्री र खेम सेन्चुरीको सुमधुर स्वर रहेको छ। गायकद्वयलाई रूपी सिन्जाली, ज्ञानु परियार, रमेश परियार र राजु सुनामले कोरश भोकल थपेका छन्।
कविता खत्री युट्युब च्यानलबाट सार्वजनिक गरिएको गीतको शब्द र संगीत रमेश परियार,संगीत संयोजन विश्वास नेपालको रहेको छ । अशोक विश्वकर्माको निर्देशनमा तयार पारिएको गीतको भिडिओमा पुष्प खड्का र उषा उप्रेतीको मुख्य भूमिका रहेको छ ।
