पोखरा— कास्कीको पोखरा महानगरपालिका–९ स्थित पार्वती टोल नजिकै खोँचमा खसेका एक व्यक्तिको जीवितै उद्धार गरिएको छ । हिँड्ने क्रममा अचानक खसेका उनको सशस्त्र प्रहरीको टोलीले उद्धार गरेको हो । 

बिहीबार बेलुका घटनास्थल नजिकको पार्वती टोल बस्ने ६१ वर्षीय उजिर बहादुर पुनको उद्धार गरिएको हो । उनी घरदेखि नजिकै हिँड्ने क्रममा अचानक धाँजा फाटेको ठाउँमा करिब १५ मिटर तल खोँचमा खसेका थिए । 

सशस्त्र प्रहरी बल नं. २४ कालिका गण कास्की मालेपाटनको विशेष उद्धार तथा रोप रेस्क्यू टोली तत्कालै परिचालन भई उनको सकुशल उद्धार गरिएको कालिका गणका गणपति एसपी अरुण शर्माले जानकारी दिए ।

उनलाई सशस्त्र प्रहरीको उद्धार टोलीले टाउकोमा सामान्य चोट लागेको अवस्थामा उद्धार गरी उपचारका लागि गण्डकी मेडिकल कलेज नयाँबजार पठाएको समेत गणपति एसपी शर्माले बताए ।