काठमाडौं — चीन भ्रमणमा रहेकी परराष्ट्रमन्त्री आरजु राणा देउवाले चिनियाँ विदेशमन्त्री वाङ यीसँग भेट गरेकी छिन्।

शुक्रबार चीनको छेङ्दु शहरमा उनीहरूबीच भेटवार्ता भएको परराष्ट्रमन्त्री राणाको सचिवालयले जनाएको छ। विदेशमन्त्री वाङको निम्तोमा छेङ्दु पुगेकी राणाले दुइपक्षीय प्रतिनिधिमन्डलसहित भेटवार्तामा सहभागी रहिन्।

त्यस क्रममा नेपाल र चीन दुवैतर्फका विदेश मन्त्रालयस्तरीय अधिकारी पनि सामेल रहे।

परराष्ट्रमन्त्री राणा हिजो (बिहीबार) चीन भ्रमणमा गएकी थिइन्। प्रधानमन्त्री केपी शर्मा ओलीको आसन्न चीन भ्रमणको तयारीका लागि उनी त्यसतर्फ गएकी हुन्।

परराष्ट्रमन्त्री राणा भोलि (शनिबार) स्वदेश फर्कने कार्यक्रम छ। उनी आगामी सोमबार प्रधानमन्त्री ओलीसँग पुनः चीन जानेछिन्।