काठमाडौं — नेपाली कांग्रेसका महामन्त्री गगन थापाले अहिले पनि हप्तामा एक पटक नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री बनिदिनुपर्‍यो भनेर कांग्रेसलाई खबर पठाउने गरेको बताएका छन्।

तर कांग्रेस असार १७ मा एमालेसँग भएको सहमतिअनुसार सरकारलाई तलमाथि गर्ने पक्षमा नरहेको महामन्त्री थापाको भनाइ छ।

‘अहिले भर्खर प्रचण्डले कीर्तिपुरमै बोलेर जानुभएछ, यो-यो कारणले गर्दा सरकार बदलियो,’ कीर्तिपुरमा बिहीबार कांग्रेसले गरेको चुनावी सभामा बोल्दै महामन्त्री थापाले भने, ‘कांग्रेस अहिले पनि संसदको सबैभन्दा ठूलो पार्टी हो। अहिले पनि प्रचण्डले हप्तामा एक पटक कांग्रेसलाई खबर पठाउनुहुन्छ, लौ न प्रधानमन्त्री बनिदिनुपर्‍यो भनेर। यो खबर पठाउने काम पहिले अर्कैले गर्थ्यो। सरकार तलमाथि गर्ने हो भने संख्या कांग्रेससँग नै छ। तर कांग्रेसले हिजो प्रचण्डलाई प्रधानमन्त्री मान्यो, आज कांग्रेस केपी ओलीलाई प्रधानमन्त्री मानिरहेको छ, कांग्रेसलाई प्रधानमन्त्री बन्न नआउने भएर होइन।’