काठमाडौं— नेकपा एमालेले आज काठमाडौंमा जागरण सभा गर्दैछ। एमालेको काठमाडौं, ललितपुर र भक्तपुर जिल्ला कमिटीको संयुक्त आयोजनामा शुक्रबार काठमाडौंको दरबारमार्गमा जागरण सभा हुन लागेको हो।
जागरण सभा यसअघि भृकुटीमण्डपमा गर्ने भनिएपनि बुधबार स्थान परिवर्तन गरी दरबारमार्गमा गर्ने निर्णय भएको थियो। जागरण सभाअघि विभिन्न ठाउँबाट निकालिएको र्याली दरबारमार्ग पुग्ने कार्यक्रम छ।
भद्रकालीबाट सुरू हुने र्याली सुन्धारा, वीर अस्पताल, रत्नपार्क घन्टाघर हुँदै दरबारमार्गमा पुगेर सभामा परिणत हुने बताइएको छ। मुलुकमा बढ्दो अराजकता, अस्थिरताविरुद्ध लोकतन्त्र, शान्ति, राष्ट्रिय एकता, सामाजिक सद्भाव, सुशासन, समृद्धि र विकासका लागि विधिको शासन र कानुनी राजका पक्षमा जनमत निर्माण गर्ने उद्देश्यका साथ सभा गर्न लागेको एमालेले जनाएको छ।
जागरण सभाले पार्टीको दृष्टिकोण, धारणा, आमजनताका बीचमा पुऱ्याउने उद्देश्य लिएको एमालेको दाबी छ। आजै मेडिकल व्यवसायी दुर्गा प्रसाईं समूहको प्रदर्शन पनि छ। सो समूहलाई कोटेश्वरमा प्रदर्शन गर्न प्रशासनले अनुमति दिएको छ।
माइतीघरमा सहकारी पीडितहरूको प्रदर्शन जारी नै रहने बताइएको छ। यसो हुँदा शुक्रबार काठमाडौंका तीन ठाउँमा एउटै समयमा प्रदर्शन हुने भएको छ। यसले दिउँसो काठमाडौंमा यातायात प्रभावित हुनेछ। ट्राफिक व्यवस्थापन र सुरक्षा व्यवस्था सोहीअनुसार गरिएको प्रहरीले जनाएको छ।
