काठमाडौं— पूर्वसभामुख दमननाथ ढुंगानाको निधन भएको छ। काठमाडौंको फ्रन्टलाइन अस्पतालमा आइतबार निधन भएका उनको सोमबार बिहान अन्तिम संस्कार गरिने पारिवारिक स्रोतले जनाएको छ।

वरिष्ठ अधिवक्ता समेत रहेका ढुंगाना कलेजोसँग सम्बन्धित समस्याका कारण केही समयदेखि उपचाररत थिए। 

ढुंगानाको निधनपछि प्रधानन्यायाधीश प्रकाशमान सिंह राउत, प्रतिनिधिसभाकी उपसभामुख इन्दिरा राना, नेपाल बार एसोसिएसनका अध्यक्ष गोपालकृष्ण घिमिरे लगायत अस्पताल पुगेका थिए।

सो क्रममा प्रतिनिधिसभाकी उपसभामुख रानाले आफूले ढुंगानालाई अभिभावको रूपमा लिएको र उनको निधनप्रति निकै दुख लागेको बताइन्।

२०४८ सालमा काठमाडौं क्षेत्र नं २ बाट नेपाली कांग्रेसका तर्फबाट प्रतिनिधिसभामा निर्वाचित उनी ०५१ सम्म सभामुख भएका थिए।