गुल्मी— गुल्मीमा चट्याङ लागेर २ जना घाइते भएका छन्। मदाने गाउँपालिका  १ अग्लुङमा चट्याङ लागेर ४६ वर्षीया मुना राउत र ४५ वर्षकी मञ्जु विष्ट घाइते भएका हुन्।

दिउँसो ४ बजेतिर घरमै बसिरहेको समयमा चट्याङ परेर अग्लुङको ओख्ले निवासी मुना राउत घाइते भएको स्थानीय बसन्त राउतले बताए। उनी अझै बेहोस रहेको राउतले बताए। त्यस्तै चट्याङ लागेर रिडिवन कि मञ्जु विष्ट घाइते भएकी छन्।

घाइते रहेकी उनलाई उपचारका लागि जिल्ला अस्पताल लैजाँदै गरिएको विष्टले बताए। उनीसँगै ४–५ जना बालबालिका पनि बेहोस भएकोमा अहिले होस खुलेको छ।

चट्याङका कारण सोही वडाको गाउँ आरनटोलका सत्यलोक बिकको घर भत्केको पनि बताइएको छ। चट्याङका कारण अग्लुङका धेरै घरमा विद्युत अवरुद्घ भएको निजामति सेवामा कार्यरत स्थानीय राजु विष्टले बताए।