सल्यान— बाँकेको नेपालगञ्जदेखि रुकुम पश्चिम जाँदै गरेको फोर्स गाडीमा आगलागी भएको छ।

पश्चिम रुकुम चौरजहारी नगरपालिकाको–११ चौफातर्फ जाँदैगरेको गाडी बुधबार बेलुका सल्यानको बागचौर नगरपालिका –१ थारमारे चारखोलामा आगलागी भएको हो।

बेलुकी ६ बजे  भे १ ख ३७५० नम्बरको फोर्स गाडीमा आगलागी भएको  सल्यान प्रहरीले जनाएको छ। जिल्ला प्रहरी कार्यालय सल्यानका अनुसार गाडीमा अचानक आगो लागेको र नियन्त्रण आइनसकेको छ। 

प्रहरीका अनुसार आगलागीबाट मानवीय क्षति भएको छैन। घटनास्थलमा प्रहरी पुगेको छ । २९ जना यात्रु सवार गाडीमा रहेको यात्रुहरूको सबै समान जलेर नष्ट भएको प्रहरीको भनाइ छ।