काठमाडौं— पाल्पाको रम्भा गाउँपालिका ३ अगाहखोलामा एउटा ट्रकले अर्को ट्रकलाई ठक्कर दिंदा एक जनाको मृत्यु भएको छ। बुटवलबाट पोखरा जाँदै गरेको लु१ख ९३५१ नम्बरको ट्रकले गएराति करिब ११ बजे ना१क ७१२१ नम्बरको ट्रकलाई पछाडिबाट ठक्कर दिँदा ९३५१ नम्बरको ट्रक चालकको मृत्यु भएको हो।

मृत्यु हुनेमा रम्भा गाउँपालिका ३ बस्ने २३ वर्षीय भुवन सिंह राना छन्। उनलाई दायाँ खुट्टा च्यापिएको अवस्थामा प्रहरीले उद्धार गरेर उपचारका लागि लुम्बिनी मेडिकल कलेज प्रभास, पाल्पामा पठाएको थियो।

त्यहीँ उपचारको क्रममा रानाको मृत्यु भएको जिल्ला प्रहरी कार्यालय पाल्पाका सूचना अधिकारी सुनिल मल्लले जानकारी दिए। ट्रकका सहचालक स्याङ्जाको वालिङ नगरपालिका १० बस्ने २१ वर्षीय सन्जित खवास थापाको हातमा चोट लागेको छ। उनको अवस्था सामान्य छ।

सो घटनामा ना१क ७१२१ नम्बरको ट्रक चालक स्याङ्जाको वालिङ नगरपालिका ९ बस्ने ५६ वर्षीय गुप्तबहादुर गुरुङ भने सकुशल छन्। ब्रेक फेल भएर दुर्घटना भएको हुनसक्ने प्रारम्भिक अनुमान गरिएको छ। घटनाबारे थप अनुसन्धान भइरहेको प्रहरीले जनाएको छ।