काठमाडौं— बम राखेको हल्ला फैलिएको भारतको नयाँदिल्लीबाट आएको भिस्टारा जहाजमा रहेका १५७ जना यात्रुलाई अनुसन्धानका लागि आइसोलेसनमा राखिएको छ।

अन्तर्राष्ट्रिय नागरिक उड्डयन सङ्गठन (आइकाओ)को सुरक्षा मापदण्डअनुसार अहिले विमान, यात्रु र ब्याजेगमाथि अनुसन्धान थालिसकिएको त्रिभुवन अन्तर्राष्ट्रिय विमानस्थल सुरक्षा कार्यालयका प्रवक्ता, प्रहरी वरिष्ठ उपरीक्षक डम्बरबहादुर विकले जानकारी दिए।

उडान नम्बर ‘यूके १५५’को उक्त विमान काठमाडौंमा आज अपरान्ह साढे ४  बजे अवतरण भएको थियो। अहिले विमानस्थलका अन्य उडानहरू भने सञ्चालन भइसकेको विकले जानकारी दिए। सेनाको बम डिस्पोजल टोलीसहितका सुरक्षा अधिकारीहरूले अनुसन्धान थालिसकेका पनि उनले बताए।