पोखरा— कास्कीका प्रमुख जिल्ला अधिकारी भरतमणि पाण्डेले सहकारी पीडित र रास्वपाका नेता कार्यकर्ताहरूलाई अनुसन्धानमा सघाउन आग्रह गरेका छन्।

रास्वपाका नेता–कार्यकर्ता र सहकारी पीडितहरू प्रदर्शनमा उत्रिने भएपछि प्रजिअ पाण्डेले सुरक्षा संवेदनशीलतालाई ध्यान दिन अपिल गरेका हुन्।

लोकतान्त्रिक अभ्यास गर्न पाइए पनि आफूले गर्दा अरुलाई असर नपरोस् भन्नेतर्फ ख्याल गर्न अनुरोध गर्दै उनले भनेका छन्, ‘विरोध र समर्थनमा गर्ने कार्यक्रमहरू शान्तिपूर्ण हुनुपर्छ, लोकतन्त्रको अभ्यास गर्न पाइयो तर आफूले गर्दा अरुलाई डिस्टर्ब हुने, शान्ति सुरक्षा भङ्ग हुने खालको गतिविधि गर्नु भएन, उच्छृङ्खल गतिविधि गर्नु भएन ।’

शान्ति सुव्यवस्थामा खलल पुग्ने खालका गतिविधि नगर्न उनले दुवै पक्षलाई अनुरोध गरे । साथै विषय अदालतमा प्रवेश गरिसकेकाले अदालतको निर्णयलाई मान्नुपर्ने उनले बताए।

पोखराको सूर्यदर्शन सहकारी संस्थाको रकम अपचलनमा मुछिएका रवि लामिछानेलाई प्रहरीले गत शुक्रबार काठमाडौंबाट पक्राउ गरी रातारात पोखरा पुर्‍याइएको थियो। आज आइतबार उनलाई अदालतमा पेस गरिँदै छ।

रवि पक्राउको विरोधमा रास्वपाले पोखरा केन्द्रित प्रदर्शन गर्दै आएको छ। हरेक जिल्लाबाट कम्तीमा एक सय जनालाई पोखरामा भेला हुन रास्वपाले सर्कुलर गरेको छ।

यसैगरी सहकारी पीडितहरूले पनि न्याय माग्दै प्रदर्शन गर्न सार्वजनिक आह्वान गरेका छन्। सहकारी पीडित र रास्वपा कार्यकर्ताहरू प्रदर्शनमा उत्रिँदा तनाव सिर्जना हुन सक्ने भएकाले पोखराको सुरक्षा व्यवस्था चुस्त पारिएको छ।