काठमाडौं— टर्कीका राष्ट्रपति रेसेप तैयप एर्दोगानले इस्लामिक स्टेट भनिने आईएसआईएसका नेता सिरियामा भएको कारबाहीमा मारिएको बताएका छन् । 

राष्ट्रपति एर्दोगानले आइतबार एक टीभी प्रसारणमा टर्कीको राष्ट्रिय गुप्तचर संस्थाले आईएसआईएसका नेता अबु अल–हुसेन अल–हुसेनी अल–कुर्शीलाई मारेको जानकारी दिएका हुन् । उनले उक्त आंतकवादी नेतालाई टर्कीको गुप्तचर संस्थाले 'लामो समयदेखि' निगरानी गरिरहेको बताए ।

'यो व्यक्तिलाई एमआईटी (टर्कीको राष्ट्रिय गुप्तचर संस्था) ले गरेको कारबाहीमा निःशस्त्रीकरण गरिएको थियो', उनले भने, 'अबदेखि, हामी आतंकवादी संगठनहरू विरुद्ध भेदभावविना हाम्रो लडाई जारी राख्नेछौँ ।'

उनले टर्कीको आतंकवाद विरुद्धको लडाईले युरोपको सुरक्षामा योगदान पुर्‍याउनेसमेत बताए । उनले दाबी गर्दै भने, 'युरोप यसबारे सचेत छैन वा यसबारे सचेत हुन चाहँदैन ।'

गत अक्टोबरमा सिरियामा फ्रि सिरियन आर्मीद्वारा पूर्ववर्ती अबु अल–हसन अल–हाश्मी अल–कुरैशीको मृत्युपछि अल–कुर्शी आईएसआईएसको नेतामा नियुक्त भएका थिए । 

अल–कुर्शीको बारेमा थोरै थाहा थियो, तर उनको नियुक्तिको समयमा, आईएसआईएसले उनलाई पुरानो लडाकुको रूपमा वर्णन गरेको अमेरिकी समाचार संस्था सीएनएनले जनाएको छ ।