काठमाडौं— राजस्व अनुसन्धान विभागले राष्ट्र बैंकको स्विकृति बिना विदेशी बैंकमा रकम जम्मा गरेको अभियोगमा विकल पौडेलविरुद्ध १ अर्ब ८३ करोड ३९ लाख ६३ करोड मागदाबीसहित जिल्ला अदालत काठमाडौंमा मुद्दा दायर गरेको छ।

सुरक्षण मुद्रण केन्द्रका पूर्व कार्यकारी निर्देशक पौडेल गत जेठमा विशेष अदालतबाट भ्रष्टाचारी ठहर भएर यसअघि नै जेलमा छन्। सजाय भोगिरहेकै बेला उनीविरुद्ध विदेशी मुद्रा अपचलनसम्बन्धी विभागले अर्को मुद्दा दायर गरेको हो।

पौडेलकी श्रीमती एलिना बस्नेतविरुद्ध ४ करोड ५८ लाख १२ हजार मागदाबीसहित मुद्दा दायर गरिएको छ। उनीमाथि विदेशी मुद्रा अपचलनमा सहयोगीको भूमिका निर्वाह गरेको आरोप रहेको छ। पौडेल दम्पतीविरुद्ध १ अर्ब ८७ करोड ९७ लाख मागदाबीसहित हिजो मुद्दा दायर गरिएको विभागले जनाएको छ।

पौडेलमाथि विदेशी मुद्रा अपचलन गरी कारोबार गरेको विदेशी मुद्रा (यूएसडी र एसडीजीसमेत) जम्मा हुन आउने नेपाली रुपैयाँ ६१ करोड १३ लाख अपचलन भएको पुष्टि भएको छ। विदेशी विनिमय नियमित गर्ने ऐन बमोजिम उनको बिगो रकममा तीन गुणा थप गरी मुद्दा दायर भएको हो।

पौडेलकी श्रीमती बस्नेतले राष्ट्र बैंकले जारी गरेको एकीकृत परिपत्रको उल्लंघन गरेको भन्दै अमेरिकी डलर १ लाख २९ हजार अर्थात नेपाली रुपैयाँ १ करोड ५२ लाख ७० हजार ४ सय ७० कायम गरिएको छ। ऐनमा उल्लेख भएअनुसार बिगो र जरिवानासहित कायम गरिएको ४ करोड ५८ लाख १२ हजार दाबी गरिएको हो।

श्रीमती बस्नेतलाई भने फरार सूचीमा राखिएको छ। सुरक्षित मुद्रण केन्द्रका कार्यकारी निर्देशक रहेकाबेला सेक्युरिटी प्रिन्टिङ खरिद र व्यवस्थापनका सिलसिलामा अवैध रुपमा सम्पत्ति कमाएको अभियोगमा पौडेललाई विशेष अदालतले गत जेठमा २ वर्ष कैद र २५ करोड जरिवाना ठहर गरेको थियो। विभागमा महानिर्देशक चण्डीप्रसाद घिमिरेले कानुनतः हदैसम्मको बिगो र जरिवाना दाबी गरेर मुद्दा दायर गरेको बताए।